To røykdykkarar omkom – huseigar sikta for brannen i Verdal

Roger Kvello Hansen (51) og Geir Otto Lein Johnson (58) omkom i jobben med å sløkke ein bustadbrann i Verdal, natt til onsdag 7. januar.

Dei to røykdykkarane gjekk inn i det brennande huset på Vinne i Verdal, men kom seg aldri ut.

– Huseigar har fått status som sikta i saka som gjeld sjølve husbrannen.

Det seier påtaleansvarleg politiadvokat Kjetil Bruland Sørensen i Trøndelag politidistrikt.

– Saka blir etterforska som eit mogeleg brot på straffelova si bestemming om aktlaus framkalling av fare, og politiet ønsker å undersøke digitale einingar tilhøyrande huseigar.

Politiet etterforskar samstundes saka bredt opp mot fleire relevante hypotesar.

– Politiet vil understreke at det framleis ikkje ligg føre noka klare svar på kva som er brannårsaka, legg Sørensen til.

Brannvesenet har rutinemessig status som sikta

Politiet er i gang med å etterforske brannen i to spor: Sjølve brannen og arbeidsulukka.

I etterforsking av arbeidsulukka har Brannvesenet IKS Midt rutinemessig status som sikta.

Det er fordi dei er arbeidsgjevar for dei to omkomne.

– Me jobbar bredt i etterforskinga og er i ein fase der me samlar inn informasjon, seier Sørensen.

Politiet har gjort omfattande åstadundersøkingar med bistand frå Kripos og ein brannteknisk sakkunnig.

– Med mål om å finne årsaka til brannen og undersøke omstenda som førte til arbeidsulukka, skriv politiet i ei pressemelding.

I tida framover vil det bli gjort avhøyr og andre undersøkingar.

I tillegg er Arbeidstilsynet kopla på saka.

Sikta var i avhøyr onsdag

Advokat Geir Ove Sørholt er utnemnd som forsvarer for den sikta huseigaren. Han var med klienten sin i avhøyr hos politiet onsdag.

– Eg ønsker ikkje å kommentere korleis han stiller seg til siktinga, seier Sørholt.

Forsvararen fortel at klienten hans har det tungt etter brannen som tok to menneskeliv.

– Eg ønsker ikkje å kommentere siktinga utover det som står i pressemeldinga til politiet.

Brannvesenet og lokalsamfunnet i sorg

På brannstasjonen i Verdal sit dei igjen med mange spørsmål, samstundes som dei sørger etter å ha mista to av sine nære kollegaer.

Dei to omkomne var deltidstilsette og blir beskrivne som dyktige røykdykkarar.

– No må me ta ein dag om gongen. Me må prøve å stå i det og bidra der me kan. Eg håpar at me klarer å stille opp for alle som treng oss.

Det seier brannsjef Håvard Bye i Innherred IKS.